NATIONAL – Utro nga lumubo an utang han gobyerno ha P15.48 trillion ha paghuhuman han Hunyo, subay ha datos tikang ha Bureau of Treasury (BTr).
Pangunahon nga rason in an paghitaas han internal ngan external debt nga gindunganan pa han paghinay han balor han peso.
Basar ha datos han BTr, humitaas an kabug-usan nga obligasyon han estado hin P135.90 billion dida han Hunyo. mas hitaas ine hin 0.9% tikang dida han Mayo.
Kun igkukumpara naman dida han nakalabay nga tuig, humitaas ine hin 9.4% o kaparehas han P1.335 trillion.
Ha internal debt han gobyerno, humitaas ine hin 1.2% o P10.57 trillion dida han Hunyo resulta han pagpagawas han government securities nga nagkakantidad hin P129.9 billion.
Samtang an outstanding external debt naman han gobyerno in humitaas hin 0.1% o P4.91 trillion dida han Hunyo ngan kadugangan nga P5.62 billion.
Resulta ine han net borrowing ngan revaluation han dollar-denominated debt mahitungod ha paghinay han balor han peso nga na-offset naman han P13.56 billion nga iban tikang ha paborable nga adjustment ha iba nga kurensiya.
