TACLOBAN CITY – Patay an usa nga sibilyan mahuman pusilon hin usa nga pulis ha Brgy. Paya, Giporlos Eastern Samar.
Ginkilala an biktima kan Nilo Catugda Lavilla, 45 anyos an pangidaron, inasaw-an, usa nga driver ngan residente han mao nga lugar.
Samtang ginkilala naman an pulis nga suspetsado nga hi SPO2 Cesar L. Cabardo, 50 anyos an pangidaron, inasaw-an, active member han PNP nga presente nga naka-assign ha Quinapondan MPS ngan residente han Brgy. Parena Giporlos, Eastern Samar.
Sumala kan PCI Clark Chavaria, hepe han Giporlos PNP, nga una anay nga nag-amok an mao nga biktima ngan nangayat hin pupniti ha usa nga SPO4 nga sangkay han mao nga suspek.
Pero imbes nga an SPO4 an umatubang lugod in gintapo ini hiya han Pulis nga hi SPO2 Cabardo.
Didto na nga gintutukan han Pulis nga hi SPO2 Cabardo an biktima han iya Kalibre 9mm nga pusil.
Dayun naman nga nagmakaluoy an biktima nga hi Nilo Catugda ngan nagyakan nga diri ini maato.
Pero imbes nga maluoy in ginpadalagan naman ini han Pulis ngan didto na nga ginpusil.
Nakag-angkon hin duha nga igo ha bungkog an biktima nga rasun han iya dayun nga kamatayun.
Naidara pa ini ha Hospital pero dayun naman nga gindeklara nga dead on arrival.
Dayon naman nga sumurender ha an suspek ngan ha pagkayana in nakadetained ha Hiporlos Police Station.
Ginkumpirma han Giporlos PNP nga hubog o nakainom an pulis nga hi SPO2 Cesar Cabard.
Subay ha pakipaghimangraw han Bombo Radyo Tacloban kan PCInsp Clark Chavaria, Hepe han Giporlos PNP, nga gin-amin mismo ha iya han suspek nga hi SPO2 Cabardo nga nakainom ini rasun han nabuhat nga pagpusil.
Nabaruan nga duty pa ngayan an mao nga pulis ha Quinapondanan MPS ngan dumayo la ha Giporlos para mamatron
Samtang, nagpapabilin naman ha pagkayana hi SPO2 Cabardo ha Giporlos PNP ngan gin-aandam an kaso nga Murder nga igpapasaka ala kontra ha iya.
