TACLOBAN CITY — Patay an usa nga Drug suspek mahuman nga umato ha mga kapulisan ha gindumara nga drug buy-bust operation ha Brgy. Sagkahan, Carigara, Leyte.
Kinilala an suspek nga hi Edward Roxas Bendiro “alyas” Wain, ada ha igo nga pangidaron, waray trabaho ngan nag-uukoy la mismo ha mao nga baranggay.
Sumala kan PMaj. Ambrocio Demain, Chief of Police han Carigara Municipal Police Station, an mao nga suspek in usa nga ex-convict sugadman ginkikilala nga High Value Target (HVT) han mga operatiba.
Basar ha inisyal nga imbestigasyon, nagprobar nga humugot hin pusil an suspek mahuman nga matunugan nga mga kapulisan an iya ka-transaksyon ngan didto nakipagbinalyuay pa ini hin buto hin pusil ha mga kapulisan kun diin naigo an suspek ha magkalain-lain nga parte han iya lawas hinungdan han iya kamatayon.
Ha mao nga operasyon, narekober an usa nga kalibre 45 nga pistola nga mayda sulod nga live ammunition, P500 bill, ngan 49 kabug-os hin 500 kapesos nga boodle money.
Subay ha mga otoridad, narekober pa ha patay nga lawas han biktima an lima kabug-os han gitutuohan nga shabu.
Pahayag naman han kampo han mga kapulisan nga waray hira intensyon nga patayon an suspek ngan depensa la an natabo nga insidente.
