TACLOBAN CITY – Nadakop han Philippine Drug Enforcement Agency kasugbong an Kapulisan ha Calbayog ngan kasundaluhan pinaagi hin usa nga drug buy bust operation ha Purok 3, Barangay Obero, Calbayog, City.
An nadakop ha buybust operation nakilal-an nga he Marvin Lledo Cotamora, 32 anyos, inasaw-an, usa nga parag-uma ngan residente han Calbayog City.
Nahitabo an buybust operation alas 5:40 han umagahon ngada han nakalabay nga adlaw kon diin nakuha ha ira an unom ka-sachet hin shabu, usa nga caliber 45 pistol nga mayada pito nga live ammunition; 1,680 pesos nga ira kita ngan 500 peso bill nga gingamit nga buybust money.
Upod gihapon ha mga naaresto, an pira nga mga high value target ngan priority target list nga mga drug personality nga nakilal-an nga hira Lina Reoyan Salurio, usa nga Canteen Vendor; Manilyn Genelado Sarmiento, usa nga Admin Staff; Gregorio Llebado Catamora, usa nga parupangisda; Rolando Lagarto Ompad, usa nga karpentero; George Tayab Dimakiling, usa nga tricyle driver; ngan Marvy Llado Catamora, usa nga licensed teacher.
Gintutudlok naman han PDEA an nahitabo nga buybust operation komo usa nga High Impact Operation tungod nga an mga personalidad nga nadakop in puro high value target ngan an pagka-dismantle hin usa nga drug den.
Ha pagkayana, an mga suspek in nakapaslak ha Calbayog City Police Office-Lock Up Facility samtang ginaandam an kaso nga igpapasaka kontra ha ira tungod han pagtalapas han Republic Act No. 9165 o han Comprehensive Dangerous Drugs Act of 2002.
