Nagpadara hin bulig an Estados Unidos ha mga residente han Manay, Davao Oriental nga naapektaran hin magkasunod nga magnitude 7.4 ngan 6.8 nga linog dida han Biyernes.
Subay ha US Embassy, kaupod ha iginpadara nga ayuda an sobra 137,000 nga family food packs, ngan 500 nga emergency shelter kits.
Ginmalatumat ni US Ambassador MaryKay Carlson nga nakikigsumpayan hira ha Department of Social Welfare and Development agud matudlok pa an kadugangan nga panginahanglan han mga naapektaran.
Nagpaabot gihapon hin pakikisubo an iba pa nga mga nasud.
Ha bulag nga pahayag, ginmalatumat ni Japanese Ambassador Endo Kazuya nga nakikiusa an Japan ha mga Pilipino, “with hope, strength, and solidarity.”
Iginpahayag gihapon ni Australian Ambassador Marc Innes-Brown an pagbilib han Australia ha “resilience and response” han Pilipinas ha atubangan han magkasusrunod nga kalamidad.
Samtang, nagpahayag gihapon an Chinese Embassy hin pakikisubo ha mga namatay ngan an paglaum nga madagmit nga makabakdaw an Davao region.
Ginbana-bana naman nga maabot ha P100.25 milyon an kantidad han danyos ha imprastraktura ha Davao region ngan CARAGA, nga ginkakalakipan han 273 nga naguba nga pasilidad.
