TACLOBAN CITY – Patay na han matad-an han mga otoridad an lawas han anay nahireport nga nawawara han nakalabay nga Abril 9, 2023.
Ginkilala an biktima kan Alexander Valle Jr. 21, anyos an pangidaron ngan residente han Barangay 74 Hollywood Nula-Tula Tacloban.
Una hine, nagpahibaro na an mga kag-anak han biktima ha mga otoridad nga daw nawawara an ira anay mahuman ine nga mangarigo.
Sumala kan PCpt. Marjorie Manuta, Information Officer han Tacloban City Police Office, nga pinaagi han gindumara nga search and rescue operation in natad-an an patay nga lawas han biktima nga naglulutaw-lutaw ha baybayon han Cancabato Baye ha may Brrgy.99 Diit Tacloban.
Dayon naman nga ginkumpirma han pamilya han biktima nga an nawawara nga hi Alexander an nasabi nga patay nga lawas, ngan hapagkayana in adto na ine ha usa nga Funeral Services.
Mababaruan nga nawara ine han nakalabay nga Easter Sunday kun diin nangarigo an mga ine ha usa nga beach resort ngan, gintutuohan nga lumangoy pa ine kaupod han iya mga barkada ha may ilarom han San Juanico Bridge, kun diin masulog an tubig nga nagin rason han ka-anod han biktima.
Nagpahimatngon naman an nasabi nga opisyal ha mga kag-anak, ilabi na kun na-ngangarigo an mga ine hin dagat in atendiran an ira mga anak ngan dire la mag-pukos ha karisyuhan, matungod nga an disgrasya in dire ginsasabot.
