TACLOBAN CITY – Naiuli na ha ira tagsa-tagsa nga lugar an patay nga lawas han unom nga mga sundalo nga naawatan hin kinabuhi ha nahitabo nga engkwentro ha butnga han mga militar ngan New People’s Army (NPA) ha Borongan City Eastern Samar han nakalabay nga semana.
Sumala kan Lt. Col. Jasper Pecson, Commanding Officer han 14th Infantry Battalion, ini in mahuman an gindumara nga send off ceremony para ha mao nga mga sundalo.
Tulo kaadlaw anay nga ginlamayan an mao nga ginkokonsidera nga mga bayani ha Camp Vicente Lukban ha Catbalogan City san-o nga ig-uli ha ira mga lugar.
Dugang pa ni Col. Pecson, bisan kun nadara na ha ira tagsa tagsa nga lugar an mga namatay nga sundalo in mahugot la gihapon an pagbabantay ha seguridad nga ira igpapatuman hasta nga mailubong na an mga ini.
Mahinumduman nga kalakip ha mga namatay ha engkwentro hira Sgt. Rex Jadulco han Motiong, Samar; Corporal Limar Banug han Borongan City; Corporal Ronaldo Go ngan Private First Class Junmar Buranday nga parehos mga taga-Burauen, Leyte; Private First Class Kent Loyd Agullo han Arteche Eastern Samar ngan Private Charlie Del Rosario han Kalinga, Apayao.
Ha pagkayana in nagpapabilin naman ha ospital an pira nga mga kasundaluhan nga grabe nga nasamaran ha mao nga engkwentro.
