TACLOBAN CITY – Usa insidente hin pamusil an nahipatik ha Brgy. Ngolos, Guiuan, Eastern Samar kun diin usa nga driver hin tricycle an ginpamusil-patay.
Ginkilala an biktima kan Sefarin Baldecañas, ngan residente hiton Brgy. Sulangan, Guiuan, Eastern Samar.
Sumala kan PLt. Col. Dexter Eduillo, Chief of Police hiton Guiuan Municipal Police Station, namamasaheros an biktima tikadto ha proper han Guiuan kun diin mayda ine tulo nga pasaheros nga sakay.
Waray daw ideya an mga witness o an mga pasaheros kun hin-o an nagbuhat han krimen mahitungod nga kamot la an nakit-an han mga ine ngan an kolor han motor han duha nga suspek ngan usa la nga buto hin pusil an binati kun diin dead-on-the-spot dayun an biktima.
Nakuha naman ha lugar han insidente an usa nga basiyo han caliber .45 nga pusil.
Padayon naman an ginbubuhat nga imbestigasyon han mga kapulisan agud mahibaruan an motibo han mga suspek ngan dayun nga maaresto an mga ine.
