NATIONAL – Gin mando na ni Transportation Secreatary Vince Dizon an pagbawi han lisensya han usa nga taxi driver ngan prangkisa han operator hine mahuman nga mag-viral an pag-aro han driver hin P1,260 nga pamasahe tikang ha NAIA Terminal 3 tikadto han Terminal 2 nga mayda la kahirayo nga 8.4 kilometro.
Sumala kan Dizon, dayun niya nga gin mando ha Land Transportation Franchising and Regulatory Board (LTFRB) ngan Land Transportation Office (LTO) nga kanselahon an lisensya han driver ngan prangkisa han operator.
Dugang pa hine, sigurado daw nga maaram an operator ha ginbubuhat han driver ngan damo an mga report kasumpay ha sugad nga insidente.
Nahibaruan nga an taxi in naka-rehistro ha usa nga Taxi Hub Transport. Subay ha mga ine, dire gintutugutan an ira mga driver nga mangontrata hin usahan o pakyaw nga bayad.
Gin abisuhan ni Dizon an publiko nga mag-report han mga sugad nga insidente ngan gin rekomenda an paggamit han mga Transport Network Vehicle Services (TNVS) o ride-hailing apps agud malikayan an sugad nga panguwat ngan panlimbong.
