TACLOBAN CITY – Nagtikang na pamintar hiton kakarsadahan an buhatan han Traffic Operation Management Enforcement and Control Office Tacloban TOMECO, ha pira nga mga eskwelahan ha syudad.
Ine in kasunod han nagin anunsyo nga magtitikang na an limited face-to face classes yana nga Agusto 22, 2022.
Sumala kan Restituto Reglos, Chief Operation han Tomeco, nga mayda na hira mga eskwelahan nga human na napinturahan an mga pedestrian lane, kun diin dako ine nga bulig para ha mga estudyante para ha ira katalwasan.
Dugang pa han mao nga opisyal, nga ine gihapon in makakabulig ha mga namamasada nga pampasaheros nga sarakyan, nga mag-minor an mga ine pag-abot ha mga eskwelahan ilabi na ha pedestrian lane, kun diin natabok an mga estudyante ngan iba pa nga mga manarabok.
Nagpatapod naman ine nga magbubutang hira hin mga tinaglawas hiton TOMECO, ha kada-tarabukan agud nga masigurado an katalwasan han publiko.
Nanawagan naman an TOMECO ha mga nagamit hiton sarakyan nga magsunod an mga ine ha mga ginpapatuman nga aludayday hiton trapiko.
