TACLOBAN CITY – Naglatag hin detalyado nga traffic management plan an Traffic Operations Management, Enforcement and Control Office (TOMECO) para masiguro an mahinayon nga pagdalagan han trapiko durante han parada.
Sumala kan Retired Police Major Restituto Reglos, Operations and Enforcement Officer han TOMECO, magtitikang an traffic rerouting alas-4 han aga basi malikyan an pagsamok ha ruta han parada.
Sumala ha iya, igsasara an ruta tikang ha Coca-Cola tubtob Independencia. An mga sarakyan nga tikang ha Coca-Cola in tubtob la Independencia, pero kun puno na an mao nga aragian, in puwede hira lumiko ngadto ha Ariano o Lucban tipakadto ha San Fernando para makabalik ha Coca-Cola. An mga pampubliko nga sarakyan naman pa-aagion ha Old Road, Sagkahan.
Gindig-unan ni Reglos nga ig-rereserba an Real Street para han mga VIP ngan opisyal nga mga sakyanan, samtang an mga nagawas nga pampubliko nga transportasyon kinahanglan magpabilin ha tuo nga parte han kalsada. An mga tikang ha norte nga masulod ha Leyte Progressive Development Center in pag-aagion an Imelda Extension ngan magawas ha Congressman Mate Avenue basi mas hirani an mga pasahero ha lugar nga ira kakadtoan.
Ginalalauman han TOMECO nga maabot hin upat ka oras an parada, depende ha kadamuon han mga partisipante. Tungod hini, nagtikang na an opisina hin clearing operations, lakip an pagtanggal han mga nakaparada nga sarakyan ha mga kalsadang pag-aagian han parada.
An opisyal nga ruta han parada magtitikang ha Magsaysay Boulevard, madiretso ha Justice Romualdez Street ngan Rizal Avenue, antes lumiko ngadto ha Imelda Extension, mabalik ha Real Street, ngan mabalik utro ha Magsaysay Boulevard. May mga lugar liwat nga igintalaan para ha mga presentasyon han mga contingents, sanglit gin-aaghat an publiko nga magsunod han mga ipapatuman nga traffic advisories.
Ha kataposan, nangaro hi Reglos han kooperasyon han publiko pinaagi han pagsunod ha mga traffic enforcers ngan mga rerouting scheme. Sumala ha iya, pinaagi han disiplina ngan pagsinabtanay han ngatanan, masisiguro an mahinayon nga pagdalagan han trapiko ngan an kalamposan han mga aktibidad.
