TACLOBAN CITY – Nakab-ot an kampeonato han usa nga lalaki tikang ha Tolosa, Leyte ha gindumara nga Angler’s Club Fishing Contest dida han nakalabay nga adlaw.
Sumala kan Dominador Espinosa III han Tacloban City Angler’s Club nga nadakop han taga Tolosa, Leyte an usa nga isda nga may timbang nga 1 kilo kun diin nakabot hini an kampeonato han mao nga paisan-isan ngan nakakarawat hin P15,000.
Agud nga makadaog ha nasabi nga pa-contest in kinahanglan nga makadakop hin isda an mga napartisipar kun diin, an siyahan nga makadakop hin pinakamabug-at nga isda in amo iton daog.
Sumunod naman ha kampeon kumo 1st runner up an usa nga taga Tacloban City nga nakagdaog hin P10,000 ngan 2nd runner up naman an taga Ormoc City nga nakagdaog hin P5,000.
Ginatenderan naman an mao nga fishing contest hin maabot 250 nga mga participants nga tikang pa ha magkadurudilain nga lugar ha rehiyon sugad nala ha Ormoc, Biliran, Baybay, Abuyog, Dulag, Tolosa, Tanuan, Basey, Sta. Rita. Borongan, ngan Guian.
Samtang, dugang naman ni Espinosa nga nagtikang hira hini nga paisan-isan dida la han nakalabay nga tuig kun diin, ginkakalipay hini nga nagin malinampuson an ira ikaduha nga higayon para liwat yana nga tuig.
