TACLOBAN CITY – Nakatalaan nga pag-abrihan kumo usa nga soft opening an mga kiritaon ngan pasyadahan sugad nala hiton concerts ngan carnival dida hiton Hunyo 1 kumo kaparte hiton month-long celebration para ha kapistahan hiton Tacloban.
Sumala kan Malu Tabao, Head hiton City Tourism han Tacloban City nga tentative pala an mao nga petsa ngan bangin mag-abri ini dida pa hiton Hunyo 26 pero ira gintatalinguha nga magabri hira ha Hunyo 1, ginhuhulat mangud ini nira iton budget agud matikangan na iton mga panginano.
Dugang pa han opisyal nga nakatalaan nga igbutang an nasabi nga mga pasyadahan dida ha Leyte Park tungod nga ginkikita nira nga dako pa iton lirimpiyohon ha Magsaysay tungod han Causeway Project ngan bangin gihapon maghuruot ha sulod.
Samtang, para naman hiton mga pagbubuhaton nga mga concerts in nagplaplano na gihapon iton siyudad para ha mga sikat nga banda nga i-imbetaran nira tikang ha gawas hiton Tacloban nga magtutukar kinada weekend agud magin marisyo iton month-long celebration han kapistahan ni Sr. Sto. Niño.
