ODD – Usa nga teenager ha India an naireport nga nawawara ngada pa han tuig 2010 ngan nakit-an ini ha panimalay han ira amyaw mahuman an 11 katuig.
18 anyos pala hi Sajitha han mawara hiya ha ira lugar ha Ayalur village ha Palakkad, India.
Pero dire maaram an mga kag-anak hini, nakada la ngayan ini ha balay han ira amyaw ngan nakipagtanan ha iya boyfriend nga hi Alinchuvattil Rahman.
Kaupod ni Rahman ha balay an iya nanay ngan bugto pero waray ideya an mga ini nga nakadto ngayan hi Sajitha tungod nga nakada la ini ha sakob han kwarto ni Rahman.
An libangan la ni Sajitha ha sakob hin 11 katuig amo an gutiay nga telebisyon nga may nakakonekta nga headphones.
Limitado gihapon an oras niya han paggamit han CR tungod ha kada gab-I kun diin turog na an tanan asya la an iya pakagawas ngan pakagamit han kasilyas.
Pirmanente gindadara ni Rahman an iya pagkaon ha kwarto para didto kumaon ngan nagiging bayolente ini kun may nasakob ha iya kwarto.
Mababaruan nga han nakalabay nga tuig 2021 nagkaada hin pag-aaway hi Rahman ngan an iya pamilya.
Nahuna hunaan ni Rahman nga lumakat ha ira panimalay kaupod hi Sajitha.
Tungod hini nagfile hin missing persons report an pamilya niya ha mga kapulisan ngan han mabilngan nira hi Rahman natigdaan hira nga kaupod hini an amyaw nira nga hi Sajitha nga nawawara ha sakob hin 11 katuig.
Mahuman nga kwestyonon han kapulisan an mag-uyab kun kay ano nira ini nabuhat, ginpahayag han mga ini nga natipa an ira pamilya ha ira relasyon tungod nga magkaiba hira hin reliyon.
Ha pagkayana in legal na nga nag-uupod hira Sajitha ngan Rahman mahuman nga magpakasal ha huwes.
