Dako nga ayat ha sektor han negosyo ngan ha mga konsumidor ha Sinirangan Bisayas an hataas nga sukot han kuryente, kun diin ginlalauman nga mahitaas an gastuson ha operasyon han mga establisyemento ngan mai-ibanan an kapas han publiko nga batunon an iba pa nira nga pankinahanglan.
Sumala kan Philippine Chamber of Commerce and Industry Eastern Visayas Regional Director, Eugene Tan, direkta nga maapektaran han hataas nga sukot han kuryente an mga negosyo, partikular na an mga agsob gumamit han kuryente sugad hiton mga manufacturing firms, hotel, restaurant, retail establishments, cold storage facilities, ngan iba pa nga mga gugtiay nga establisyemento.
Dugang hini nga mahitaas an operating expenses han mga ini nga posible magresulta ha paghataas han presyo han mga produkto ngan serbisyo agud makabawi ha gastos nga magreresulta naman ha paghitaas hiton inflation rate ha rehiyon.
Labot ha epekto ha ekonomiya, ginmalatumat gihapon ni Tan nga dako gihapon nga pas-anon ha publiko an hataas nga sukot han kuryente, dako iton mai-iban ha disposable income han mga pamilya ngan an ira kapas nga gumastos para ha iba pa nga imporantante nga kinahanglanon sugad han pagkaon, edukasyon, ngan panlawas.
Dugang pa ni Tan nga kun magpadayon iton hataas nga sukot han kuryente in posible ini magpahinay ha pagpapahalawig han mga negosyo ngan makakaapekto gihapon ini han pagsulod hiton mga bag-o nga mga mamumuhunan ha rehiyon.
Samtang, ginmalatumat naman hini nga kinahanglan in makabiling hin mga pan-ihaan nga solusyon nga makakabulig ha pagpaparig-on ha suplay han kuryente ha rehiyon an mga power industry agud mapugngan an padayon nga paghitaas hiton kabaraydan ha kuryente ngan mapabilin iton pagribhong han ekonomiya ha Sinirangan Bisayas.
