TACLOBAN CITY — Temporaryo la anay nga ginhimo nga treatment center para han may mga sakit nga dengue an USAID training center han siyudad han Tacloban.
Sumala kan Dr. Jaime Opinion, head han Tacloban City Health Office, ini in mahitungod nga nagkukulang na hin espasyo ha mga government hospitals tungod han padayon nga paghataas han dengue cases.
An mga pasyente nga iginkakakadto ha treatment center in tikang na ha mga ospital ngan human na macheck-up pero nagkikinahanglan pa hin kadugangan nga atensyon medikal.
Ha pagkayana in mayda na upat nga dengue patients na an nakaconfine ha mao nga dengue fast lane o treatment center han siyudad.
Samtang ginpahayag naman han Tacloban City Hospital nga padayon an pagdamo han mga pasyente nga gindadara ha ira nga nagpopositibo ha sakit nga dengue.
Sumala kan Dra. Jovina Gumagay, chief of hospital han City Hosp Marasbaras, tungod han kadamo han mga dengue patients in puno-an na an mga kwarto ha ira ospital ngan pati ha lobby in mayda na gihapon mga naokupar.
Kaudgan daw ha mga pasyente nga in mga kabataan nga nag eedad tikang ha 11 ka bulan pa igbaw.
Utro naman ini nga nagpahimatngun ha mga kag-anak nga dad-on dayon ha ospital an ira mga anak kun nakakaabat na hin haranat ha sakob hin duwa ka adlaw agud nga mahisabutan kun ini in may dengue.
