TACLOBAN CITY – Hinay-hinay na nga nakikitaan hin pagribhong an Tacloban supermarket bisan ha kaluyo hiton nagpapadayon pa nga pandemya matungod ha COVID-19.
Damo na gihapon nga mga vendors an nagkabalik ha magkadirudilain nga mga section han merkado.
Sumala kan Carlos Dave Castillo, Market Superintendent han Tacloban Supermarket, labot la ha mga vendors in nagdadamo na an mga nabisita nga mga katawhan ngan mamaralit labi na kun maabot an alas-singko hiton kulop ha kada adlaw.
Mayda na gihapon naidugang nga barbecue stall nga ginpapantukod kun maabot na an kagab-ihon sugadman an night market o night bazaars nga mas nagpapadugang hin mga nabisita ha merkado.
Nagpahimatngon naman ha publiko an mao nga opisyal nga igpabilin nga malimpyo ngan iglabog ha sakto nga labugan an ngatanan nga mga basura ngan deri igsarang ha aragian.
