TACLOBAN CITY- Gin-aaksyunan na yana hiton tinaglawas han syudad nga nagmimintinar hiton kalimpyo an partikular na ha may merkado publiko hiton syudad.
Ine in mahuman nga mag-viral ha social media, an mga reklamo kasumpay han kamabaho han gin-aagian han mga sarakyan kun diin didto ine ha bag-o nga aragianan ha may Maritime dapit luyo han Vegetable section.
Sumala kan Tacloban City Supermarket, Market Superintendent Engr. Danilo Alajas, ha pagkayana usa ha ira ginhihimo nga pitad an pangolekta hiton basura, ngan paglimpyo han mga ligid han nasabi nga dalan, matungod nga ginhihimo mangud ine nga tambakan han mga dunot nga utanon ngan prutas, ngan partikular na an mga hinugas hiton isda nga ginlalabog la ha karsada, kun diin nagreresulta gihapon ine han pagbaho hiton nasabi nga lugar.
Dugang pa hine nga, padayon gihapon an ira ginhihimo nga inspeksyon agud nga mamintinar gihapon an kalimpyo, ngan panginanuon gihapon adton mga vendors kun an mga ine nagsusunod ha pagmintinar han kalimpyo han merkado publiko.
Nagpatapod naman ine nga abre an ira buhatan ha publiko para ha mga reklamo ngan suhestyon nga pwede makabulig ha ika-uupay hiton syudad.
