TACLOBAN CITY – Ginpahayag han Tacloban City Police Office (TCPO) nga mahugot an ira pagbabantay nga ginbubuhat yana nga nagtikang na an mga aktibidad ngan mga kiritaon kaparte an kapiyestahan han syudad han Tacloban yana nga bug-os nga bulan han Hunyo.
Sumala kan Pol. Lt. Col. Edwin Cañamaque, Chief han City Community Affairs and Development Unit han Tacloban City Police Office (TCPO), sobra 20 nga mga kapulisan an nagpakadeploy ha Carnival Grounds ha dati nga Leyte Park Hotel Compound sugadman ha Sangyawan Park ha syudad.
Mayda gihapon duha nga police patrol nga nagroroving ha bug-os nga area agud nga masiguro an kahimyang han lugar.
Dugang pa hini nga ha pagkayana in waray may nahihipatik nga anuman nga untoward incident tikang han magtikang an mga aktibidad ha syudad kaparte han kapatrunan han Tacloban.
