TACLOBAN CITY – Naghangyo an Tacloban City Housing and Community Development Office ha mga nagpapamulat nga matagan hin pabahay ngan mga land titles nga makag-angan-angan tungod nga dire pa hire nakakagius ha proseso hini ha pagkayana.
Sumala kan Leonard Tedence Jopson, head han City Housing Office, ini in matungod han pag implementar han election ban kasumpay han tidaraon nga piniliay yana nga bulan han Mayo.
Matungod hini, dire gintutugot an ira pagdumara han raffle han mga pabahay sugadman an pag-award han mga titulo.
Ginpapamulat naman nira an magiging desisyon han COMELEC bahin han hangyo han National Housing Authority (NHA) nga ma-exempt ha election ban an ira pagdumara hin mga aktibidad sugad han pagdistribwer han mga land titles.
Nakapaghatag naman an City Housing hin mga certificate of confirmation ha ginatos-gatos nga mga benepisaryo han social housing projects ngan resettlement program partikular na ha Nula-Tula Tacloban han yana nga bulan han Abril.
