INOPACAN, LEYTE – Mapaso nga gin karawat han Department of Tourism Region 8 (DOT8) an 85 nga langyawanon tikang han SH Minerva han Swan Hellenic ha Digyo Island dida han Mayo 6, 2026 kumo pinaka syahan nga pagbisita han expedition cruise line ha Sinirangan Bisayas ngan ha nasud.
Kumo ika tulo nga port of call han barko ha nasud, nagbilin hin maupay nga impresyon ha mga bisita ngan cruise staff an pagbisita ha Digyo Island mahuman han mga ini ma eksperyensyahan an kultura, maupay nga pagtratar, ngan mahimyang nga panginabuhi ha isla.
Hul-os nga igin kalipay han mga bisita an higayon nga ma eksperyensyahan an lokal nga panginabuhi pinaagi han pakikiusa ha komunidad, pagtilaw han mga pagkaon, ngan iba-iba nga hirimuon pangkultura samtang nagkakaada hin oras agud pumahuway ngan dayawon an gin tatago nga kahusay han Digyo Island.
Sentro han immersion activity an tulo nga experiential stations nga nagpapakita han mga pamana ngan panginabuhi han komunidad.
Ha Station 1 o Pandanus Weaving Station, nakit-an han mga bisita an proseso ngan tradisyunal nga paghihimo hin habol gamit an kamot nga nagpapakita han lokal nga sining ngan kultura. Ha Station 2 o Fisherfolk Skills Station, nahibaruan han mga ini an pag ayad han pukot sugad man an tradisyunal nga pamaagi han pag-aasin ngan pagpapamara han isda kumo kaparte han panginabuhi han mga tawo nga nag uukoy ha ligid han dagat. Samtang, ha Station 3 o Tuba Station naman in igin oakilala ha mga bisita an lokal nga irimnon, kun diin, nakiusa an nga ini pinaagi han pag tilaw han irimnon sugad man an aktuwal nga pag kuha han irimnon ha puno han lubi.
Sumala kan Department of Tourism Region 8 Regional Director Karina Tiopes, iginpapakita ha mga sugad nga ekspeyensya an nagtitikadako nga potensyal han Sinirangan Bisayas kumo destinasyon para ha boutique ngan expedition cruise tourism, ilabi na para ha mga turista nga nagbibiling hin tinuod nga koneksyon ha kultura ngan mas hilarom nga ekspeyensya ha komunidad.
