Patay an usa nga armado nga suspek mahuman ini pusilon han mga law enforcement officer han magpabuto ini hin pusil ha usa nga checkpoint harani ha White House dida han gab-i han Sabado, Mayo 23 (oras ha Amerika).
Sumala ha pahayag ha U.S. Secret Service nga igin post ha social media, usa nga lalaki an dumaop ha checkpoint ha 17th Street ngan Pennsylvania Avenue.
Tigda daw nga naggawas hin pusil an suspek tikang ha iya bag ngan ginpabuthan an mga nakatudlok nga opisyal.
Dayun naman nga bumulos hin buto an mga tawuhan han Secret Service ngan napusil an suspek ngan gindeklara ini nga patay han daraon ha ospital.
Ha lain nga notisya, usa nga sibilyan nga naagi la ha lugar an naigo gihapon han bala ha butnga han kasamok.
Presente pa nga gin aadman kun gaano kaduro an naangkon nga samad hini, ngan dire pa gihapon klaro kun diin nagtikang an bala nga umigo ha biktima.
Iginpahayag han usa nga law enforcement official nga an suspek in ginkilala kumo indibidwal nga “emotionally disturbed person” o mayda gin aagian nga problema ha panhuna-huna.
Gindugang gihapon han opisyal nga dati na nagpagawas hin “stay-away order” o kamanduhan nga nagbabawal ha suspek nga dumaop ha nasabi nga lugar.
Waray naman tawuhan han Secret Service o mga otoridad an nasamaran ha insidente.
Gin kumpirma gihapon han Secret Service nga nakadto ha sulod han White House hi US President Donald Trump han mahitabo an pamusil, pero talwas ini ngan waray kaapektuhi han insidente.
