TACLOBAN CITY – May nakikita nga pag-umento ha sukot han kuryente ha Sinirangan Bisayas yana nga bulan hiton Hulyo, kun diin lain pa ini han nagin umento dida han nakalabay nga bulan han Hunyo.
Sumala kan Leyte III Electric Cooperatrive General Manager, Allan Laniba, ini in mahitungod han gintatawag nga Line Loss and Congestion Cost, kun diin humitaas an LLCC ha bill han ngatanan nga mga electric cooperatives ha rehiyon yana nga bulan ngan umabot hin P572.9 milyon.
Ini naman na an pinakadako nga LLCC nga nahipatik, kun diin duha ha pilo ini kun igkukumpara han P276.5 milyon nga nahipatik dida han Hunyo.
Tikang dida han Enero kutob yana nga bulan, umabot na an P1.55 bilyon an kabug-usan nga LLCC nga ginsukot ha mga kunsumidor ha rehiyon.
Subay ha Federation of Rural Electric Cooperatives in Region 8 (FRECOR), an average nga gastos han mga kooperatiba ha pagpalit han kuryente para han gintatawag nga blended generation rate in nag-umento ngada ha P12.50 kilowatt-hour yana nga bulan, kun diin mayda ini pag-umento hin haros P5 o sobra 60% kun kumpapara dida han Hunyo.
Mahitungod hini, an average nga kabaraydan han mga konsumidor in nag-umento gihapon.
Dugang pa han FRECOR 8, an region-wide average residential rate para yana nga bulan in umabot ha P19.79 kada kilowatt-hour, mas hitaas hin sobra P5 dida han Hunyo.
Apektado naman an 11 nga mga electric cooperative rehiyon kun diin an BILECO na may-ada pinakahitaas nga rarge nga maabot ha P24.35 kada kilowatt-hour.
Sugadman, gin klaro han FRECOR8 nga diri ini kontrolado han mga electric cooperative, man ngani, an nakokolekta para han LLCC in dire nahingangadto ha mga electric coop, kundi ha Wholesale Electricity Spot Market (WESM).
