BORONGAN CITY – Usa nga state university ha Borongan City an nagpatuman na hin flexible learning mahitungod han nae-eksperyensyahan nga kakulangan hin suplay ha tubig han syudad.
Nagtikang an implementasyon han flexible learning kakukop nga adlaw, Agosto 11 ngan mag-iiha kutob ha sunod nga pag-anunsyo han pagbalik ha normal han klase.
An ngatanan nga mga teaching personnel in mago-obserbar gihapon hin Work-From-Home (WFH) arrangement, samtang an mga administrative offices naman in ada ha skeletal workforce set-up agud masigurado nga dire mauundang an mga transaksyon ngan serbisyo han iskuylahan. An mga Security Services, Grounds and Physical Plant & Facilities personnel, ngan an University Infirmary naman in nagpapabilin ha ira regular nga schedule agud mamentinar an kalimpyo, seguridad, ngan serbisyo-panlawas han iskuylahan.
Samtang, iginkasubo naman ni Borongan City Mayor Jose Ivan Dayan Agda an panawagan han nasabi nga iskuylahan mahitungod nga damo man daw an pamaagi agud magkamay-ada hin tubig, labi na kun an isyu la in an igpaparigo.
Dugang pa hine, kinahanglan nga maghag-id an kada tagsa ha pamiling hin pamaagi mahitungod nga magin dependent la daw ngani ha suplay han Borongan Water District in waray an mga ine gagamiton mahitungod nga mayda problema an nasabi nga opisina.
Ginpahayag pa hine nga dida han ira paghimangraw han Manager han nasabi nga Water District in ginsumat hine nga naruba an ira water pump ha ira source han tubig ha Brgy. Cagbonga kun diin ha yana in nagpo-procure pala an mga ine.
Samtang, ginmalatumat pa hine nga magin resilient an mga istudyante ha sugad nga sitwasyon mahitungod nga kaparte daw ine hiton pag-grow hiton usa nga istudyante.
Dugang pa hine, temporaryo la ine nga sitwasyon ngan mahitungod la ine han maiha nga paghuraw.
