NATIONAL – Nagpahinumdom an state-run pension fund nga Social Security System (SSS) nga pwede mag-avails hin salary ngan pension loans an mga membro ngan pensioner nga apektado han paglasurbo han bagyong Kristine.
Subay ha pension fund, pwede mag-apply an SSS members hin loan kun nakapaghulog hin kontribusyon ha sulod han 36 kabulan o 3 katuig, kun diin an unom hine in ha sulod han urhi han 12 kabulan o usa katuig.
Kun karuyag naman daw mag-avail hin duha kabulan nga salary loan in kinahanglan nga nakapaghulog hin 72 nga kontribusyon.
Kinahanglan gihapon nga ada ha edad nga 65 anyos paubos ha oras nga mag-apply hin loan hin dire natatagan hin bisan anu nga pinal nga benepisyo sugad han total disability, retirement o death benefits.
Para naman ha mga retiree-pensioners, pwede mag-apply para ha SSS pension loan nga kaparehas hin tulo ngada ha 12 kabeses han ira basic monthly pension kaupod an P1,000 nga kadugangan nga benepisyo pero dire malahos ha maximum nga P200,000.
Pwede igpasa an salary loan application online pinaagi han My.SSS Portal. Pwede naman bayaran an loan ha sulod han duha katuig pinaagi han 24 nga monthly amortization nga mayda tinuog nga interest rate nga 10%.
