TACLOBAN CITY – Gindeklara na han provincial government han Southern Leyte an mga New People’s Army kumo persona non grata ha bug-os nga probinsya.
Ini in kasunod han rekomendasyon han 78th Infantry Batallion ngan pinaagi han ginpagawas nga joint resolution ha gindumara nga peace and order council meeting ha mao nga probinsya.
Sumala kan Lt. Col. Robert Obaob, Commanding Officer han 78th IB, nagtikang an mao nga inisyatibo ha mga lugar ha Mindanao ngan nakit-an nira nga pwede ini nga himuon nganhi ha Eastern Visayas labi na nga nagpapabilin la gihapon an presensya han mga rebelde nga grupo ha magkadirudilain nga lugar ha rehiyon.
Dugang pa hini nga gin-una nira an Southern Leyte mahitungod nga una na ini nga gindeklara nga isurgency free han tuig 2011 sanglit diri nira karuyag nga utro nga bumalik ngan magkaada hin presensya han mga rebelde ha mao nga probinsya.
Nahibaruan nga pira na gihapon nga mga local government units ha Eastern Visayas an nauna na nga magpagawas hin deklarasyon ha mga NPAs kumo persona non grata partikular na ha mga tradisyunal nga lugar nga gin-aagian han mga rebelde sugad ha Mahaplag, Burauen, Inopacan, Hilongos ngan Baybay City.
Padayon naman ira pag-aghat ha iba pa nga mga LGUs nga himuon gihapon an mao nga pitad agud nga masiguro nga diri makakasakob an mga rebelde nga grupo ha mga komunidad.
