TACLOBAN CITY – Ginkalipay han Department of Labor and Employment Regional Office 8 an maabot 849 nga aplikante nga namag-apply ha magkadurudilain nga trabaho ha gindumara nga Nationwide Job Fair dida han nakalabay nga Enero 31, 2025 ha usa nga mall ha siyudad.
Sumala kan Department of Labor and Employment Regional Office 8 Information Officer, Norma Rae Costimiano nga maabot ha sobra 600 nga mga local jobs an ginhatag ha mga aplikate tikang ha 29 nga mga pribado nga kumpanya nga nagpartisipar han nasabi nga job fair.
Dugang hini nga ha sobra 800 nga ihap han mga aplikante nga tikang ha magkadurudilain nga munisipalidad ha rehiyon 8, maabot ha 19 an na hired-on-the spot o kun nakatrabaho dayon ngan 49 naman an near-hired o kun napili pero mayda pa kinahanglanon nga igsumiter ngan igpinalisa han mga kumpanya.
Ginkakalipay naman nira an sugad nga ihap han mga aplikante nga kun diin, karuyag signgnon la hini nga produktibo ngan intresado makatrabaho an publiko.
Samtang labot la han job fair in gindumara gihapon han DOLE-8 an Kadiwa ng Pangulo kaupod an Department of Agriculture (DA) ngan Department of Trade and Industry (DTI) ngan sugadman an TUPAD payout kun diin, natagan an maabot 500 nga beneficiaries tikang ha Palo, Leyte nga nagkakantidad hin kabug-usan nga P2 million ka pesos.
