TACLOBAN CITY– Waray na kinabuhi an usa nga senior citizen, mahuman ine nga mahilakip ha nasusunog niya nga balay ha Brgy. Quilao, Tolosa, Leyte.
Gintatag-iyahan an nasabi nga panimalay ni Josefina Zeta, 84-anyos.
Sumala kan SFO4 Virgito Apurillo,OIC Municipal Fire Marshal Tolosa Leyte, nga pasado alas 7:30 nagtikang an sunog, pero naka-karawat hira hin report pasado alas 9 na hiton kagab-ihon han Pebrero 2, 2025.
Subay ha gindumara nga imbestigasyon han mga otoridad, aksidente nga natabig an lamparilya nga nakadto ha sulod hiton panimalay han biktima, rason nga magkamayda hin kalayo.
Dugang pa han ira imbestigasyon, an biktima in usa nga bed-ridden, kun diin nag-uusahan la ine han nasabi nga kaorason, matungod nga waray pa magka-abot an iya anak ngan apo.
Mababaruan nga himo ha light material an nasabi nga panimalay sanglit nga dayon nagsarang an kalayo, kun diin nakadarahig pa ine ha iya sapit nga panimalay.
Ginbabana-bana naman nga maabot ha P120K an inisyal nga danyos han nasabi nga sunog.
Ha pagkayana nakatalaan naman nga iglubong dayon an patay nga lawas han biktima ine in subay naman ha disposisyon han iya pamilya, matungod nga waray an mga ine pangastos pananglitan nga lamayan ine hin madugay.
