TACLOBAN CITY – Nagmugna na an mga kapulisan hin Special Investigation Task Group (SITG) Aquino nga matutok ha imbestigasyon bahin han nahitabo nga shooting incident ha Calbayog City nga nagresulta han kamatayon ni Mayor Ronaldo Aquino ngan upat nga iba pa.
Sumala kan Pol. Lt. Col. Ma. Bella Rentuaya, tagapagyakan han Police Regional Office 8, yana nga adlaw in nagdumara hin case conference bahin han mao nga insidente.
Dugang pa hini nga nagpagawas na gihapon hin direktiba hi PRO 8 Regional Director PBGEN Ronaldo De Jesus nga magdumara hin hilarom nga imbestigasyon bahin hini.
Usa gihapon ha ginhihingita han mga kapulisan nga matagaan hin kasayuran kun “misencounter” an nahitabo ha mao nga insidente.
Nahibaruan nga labot la kan Mayor Aquino, naawatan gihapon hin kinabuhi an driver ngan security aide hini samtang duha naman nga pulis an namatay ha kampo han Samar PDEU.
