TACLOBAN CITY – Nagtutuo an pira nga mga unibersidad ha Tacloban nga an COVID-19 pandemic an usa ha mga rason kun kay-ano nga mas humitaas pa an oras han konsumo han mga Pinoy ha pag-gamit hin internet ngan social media yana nga tuig.
Una hini, gumawas ha Digital 2021 report han socially-lead creative agency nga We Are Social ngan social media management platform na “Hootsuite” nga an Pilipinas an nanguna ha bug-os nga kalibutan ha may pinakamaiha nga oras ha pag-gamit hin internet ngan social media.
Subay pa ha pag-aram, an mga Pinoy in mayda average nga upat kaoras ngan kinse minutos kada adlaw ha pag-gamit hin social media.
Humitaas ini hin 22 minutos kumpara ha Digital 2020 average nga tulo kaoras ngan 53 kaminutos.
Sumala kan Cesar Silay, Master in IT ngan OIC Dean han ACLC College Tacloban, tungod han pandemya kun diin waray face to face classes mas humitaas an konsumo han mga estudyante ha pag-gamit hin social media platform ngan internet ngan ini an ginhihingita nga rason han panguna han mga Pinoy ha pag-gamit ha mga ini yana nga tuig.
Ginlalauman gihapon an an paghitaas ha 3 billion users yana nga tuig tungod nga accessible ngan libre la an pira nga mga platforms kun diin pwede nga makapagsend hin mensahe ngan makatawag voice call man o video call.
