TACLOBAN CITY – Ginkikita han sikat nga French luxury cruise line nga Compagnie du Ponant an Sinirangan Bisayas kumo destinasyon yana nga 2027-2028 cruise season.
Mababaruan nga dida han mga nakalabay nga adlaw in ginpanginano hine an mga destinasyon ha rehiyon kumo kaparte han assessment hine.
Ginbubug-os naman an assessment team han mga senior representatives tikang ha Compagnie du Ponant, Intercruises, ngan Travel People Ltd., ha pakipag-koordina ha Department of Tourism Eastern Visayas (DOT-8) ngan mga concerned nga local government units (LGUs), subay ha pahayag han DOT regional office ha rehiyon.
Pira han mga ginbisita hine nga lugar ha rehiyon in an Baybay City ha Leyte; Higatangan Island ha Naval, Biliran; Maripipi Island ha Biliran; Limasawa Island ha Southern Leyte; ngan an Kalanggaman Island ha Palompon, Leyte.
Panuyo naman han nasabi nga pagbisita nga panginanuon an kaandaman han rehiyon ngan potensyal hine ha pag-host han mga high-end international cruise tourism, kun diin igpaparayaw hine an mga natural attractions, island destinations, ngan local cultural experiences han Sinirangan Bisayas.
Ha lain nga bahin, syahan nga nakuha han rehiyon an atensyon han Compagnie du Ponant dida han tuig-2018 han bumisita ha Himokilan Island ngan Mahaba Island ha Leyte an luxury cruise ship hine nga L’Austral.
Ha nasabi nga pagbisita in ginpakilala an mga langyawanon nga turista ha kakaiba nga mga destinasyon ngan lokal nga kultura han rehiyon, nga nagresulta han interes han mga ine ha Siniringan Bisayas kumo cruise tourism hub.
Magpapadayon naman an assessment ha Leyte, Southern Leyte, Samar, ngan Northern Samar, kun diin naka-pokus ine ha kultura, tradisyon, ngan island experiences nga nakaka-engganyar ha cruise market.
