TACLOBAN CITY – Nagpahimatngon an Securities Exchange Commission Tacloban kasumpay han nagsasarang nga mga panguwat ha katawhan o scam.
Sumala kan Atty. Khristian Tumabiene han Securities Exchange Commission Tacloban, an SEC in an pangunahon nga ahensya nga nagrerehistro han ‘securities,’ kun diin usa nga klase hin securities in gintatawag nga ‘investment contract.’
An ‘investment contract’ in an kontrata nga nagpapahayag nga magbubutang an usa nga indibidwal hin kapital ha usa nga industriya, kun diin papadalaganon ini han industriya, ngan maghahatag hin ganansya, kun diin mapapartihan an investor ha makukuha nga ganansya.
Ugsa makagpadalagan hin negosyo an usa nga korporasyon, kinahanglan nga rehistrado ha SEC an ‘securities’ hini sugadman an ‘investment contract’ nga ginhahatag hini ha mga investors.
Dugang pa ni Tumabiene, kun usa o waray ngani an may igpresentar han korporasyon in sigurado na nga scam ini mahitungod nga waray otoridad an korporasyon nga makagpadalagan han negosyo mahitungod nga waray ini kakita han SEC.
Usa manggud ha mga kilala nga scam in an Ponzi Scheme kun diin gin aaghat han scammer an katawhan nga mag-invest hin minimum nga kantidad ngan ginpapalauman an mga biktima nga matubo an ira salapi hin pira pilo ha sulod la hin pira ka-adlaw o semana. Ha mga syahan nga higayon in ginbabalik pa an salapi pero pag-iiha ngan kun dako na an iginhuhugar han biktima in dire na napakita an scammer.
Nagpahimatngon naman an Securities Exchange Commission ha publiko nga magin maaram ngan dire tumapod dayun labi na kun kun kaduda-duda an operasyon han usa nga negosyo ngan malaksi an paggawas ngan pagsulod han salapi.
