TACLOBAN CITY – Ginpagawas na an schedule han pag-abri hiton tubig ha mga irigasyon ha Leyte para ha ikaduha nga cropping season.
Sumala kan Engr. Jojo Arceño, Engineering & Operation Division Manager hiton National Irrigation Association VIII, nga una na nga nagtikang an mga patubig ha river irrigation han Abuyog ngan Javier dida han nakalabay nga March 15 ngan ha Sta. Fe, Palo dida han April 16; nauna mangud an mga nasabi nga river irrigation mahitungod ha ginbuhat nga programa nga contract farming kun diin kinahanglan nga makapag-garab an mga nasabi nga umhanan hin mas sayo nga panahon.
Samtang, gintikangan naman an pag-abri han tubig ha irigasyon han Ormoc ngan Kanangga dida han May 1; May 2 naman ha mga munisipalidad han Dulag, Julita, Burauen, Tabon-tabon, Dagami; nakatalaan nga pag-abrihon naman an patubig ha Alang-Alang ngan San Miguel ha maabot nga May 6; pag-abot naman hiton May 13 in aabrihon naman an patubig ha Barugo, ngan nakatalaan naman pag-ulpot hiton May 15 an patubig ha pira nga liwat nga parte han Sta.Fe, Pastrana, Tanauan, Dagami ngan Tabon.
Dugang naman ni Engr. Arceno, nga an pagdestribwer hiton tubig ha mga nasabi nga irigasyon in tikang ha mga irrigators association han mga nasabi nga mga lugar, kun diin an mga ini gihapon iton mag-iigo kun kada san-o iton pandedestribwer hiton tubig ha mga umhanan.
Ginmalatumat naman han opisyal nga nagkaada hin reschedule ha cropping calender, ngan nadis-og ini hin guti mahitungod nga an lebel han tubig ha Leyte in humamubo hin guti tungod hiton hitaas nga heat index ngan grabe nga kapaso hiton panahon.
