Gin papagkomento han Korte Suprema hi Ombudsman Jesus Crispin Remulla ngan Independent Commission for Infrastructure (ICI) ha petisyon nga iginsalawad ni anay Ako Bicol Party-list Representative Zaldy Co nga na-kwestyon ha issuance han probable cause ha iya kaso nga graft ngan malversation kasumpay ha flood control scam.
Ha usa nga pahayag, ginmalatumat han korte nga gin aksyunan han en banc ha sesyon hini dida han Pebrero 11 an petisyon ni Co kontra ha Ombudsman ngan ICI, ngan gintagan an ini hin napulo kaadlaw tikang han makarawat an notice ha petition for certiorari ni Co kaupod an iya hangyo para ha pag-isyu han temporary restraining order.
Pero, waray ginpalusad nga TRO an Korte Suprema.
Pag-eskplikar han korte, an kamaduan in diri nangangaruyag sidngon nga ginkarawat na, gin aprubahan, o tatagan hin paborable nga desisyon han korte an petisyon ni Co, kasunod han di pala maiha nga ruling hini ha Vallacar Transit vs Yanzon, nga nagtutudlok han aludayday para ha gindeklara nga pugante nga gindid-an matagan hin judicial relief.
Yana nga bulan in gin deklara na han Sandiganbayan hi Co kumo usa nga pugante, nga gintotoohan aadto ha gawas han nasud tikang pa dida han nakalabay nga tuig.
Pero rason ni Co ha iya petisyon, an Vallacar vs Yanson in usa nga exception ngan nagpapabilin nga “controlling rule” an Miranda vs Tuliao, kun diin diri kinahanglan an pisikal nga pag-kustodiya ha akusado agud humangyo hin affirmative relief.
