TACLOBAN CITY—Nanginginyupo an mga supporters ha Leyte ni Davao City Mayor Sara Duterte-Carpio nga dumayon ini pagkandidato pagkapresidente ha 2022 national elections.
Ini mahuman igpahayag ni Mayor Sara nga diri na ini makandidato pagkapresidente tungod nga madalagan hi Pres. Rodrigo Duterte kumo bise presidente ha masunod nga eleksyon.
Sumala kan Bernie Tacoy, head han Run Sara Run Movement ha Leyte, ha luyo nga ginrerespeto nira an desisyon hiton presidential daughter, naglalaum la gihapon hira nga magbabag o iton huna huna hini.
Dugang pa hini nga sunod pa nga bulan iton filing hiton certificate of candidacy ngan pwede man liwat sumaliwan hi Sara hiton kapartido hini nga madalagan pagkapresidente sanglit diri nira ginwawara an posibilidad nga magbabalyu ini hin desisyon.
“If she will not run, it’s her decision to do so. We were not disappointed as we remain hopeful that she will change her mind and run for President,” pahayag ni Tacoy.
Samtang,sumala pa kan Tacoy, ha ira ginbuhat nga signature campaign, maabot na hin 20,000 nga mga supporters ni Sara iton nagpirma para maaghat ini nga sumaliwan ha iya tatay ha Malacañang.
