TACLOBAN CITY – Gin aaghat han mga supporters ha Leyte ni Davao City Mayor Sara Duterte nga kumandidato ini pagkapresidente hiton Pilipinas.
Kakulop, Agosto 9, nagmotorcade an maabot 400 nga mga supporters ni Mayor Sara tikang ha Ormoc City kutob ha Matag-ob, Leyte para aghaton an presidential daughter nga kumandidato ha 2022 national ngan local elections.
An Run Sara Run Movement Matag-ob Chapter in nakasul-ot hin green nga white t-shirts nga may nakasurat nga “Run Sara Run” ngan “Sara All” kumo pagpakita hin suporta ha anak han presidente ha iya pagkandidato.
Sumala kan Bernie Tacoy, coordinator han Run Sara Run Movement Matag-ob chapter nagtutuo hira ha kapasidad ni Sara Duterte para magin presidente han Pilipinas sanglit hingyap nira nga kumandidato ini.
“Naniniwala kami sa pamalakad ng mga Duterte at alam namin may puso si Maam Sara at di nagpapadikta”, pahayag ni Tacoy.
Dugang pa hini nga dako daw iton tsansa ni Sara nga magdaog ha eleksyon ha masunod nga tuig.
Abre naman hira ha kon hin-o man an pipilion ni Inday Sara nga iya magigin running mate.
Mababaruan nga kutob ha pagkayana in waray pinal nga anunsyo hi Sara kon madalagan ba ini para ha national elective position.
