Nagpapabilin nga positibo hi San Miguel Mayor Atty. Norman Sabdao ha kaluyo han nakarawat hini nga plano nga pagpatay ha iya ngan ha iya executive assistant dida han mga nakalabay nga adlaw.
Sumala ha mayor nga nagpapasalamat hiya ha makagarahom nga naproteheran an iya kinabuhi kontra ha nasabi nga panhulga ngan nagin malinangpuson an operasyon han National Bureau of Investigation agud mabalabgan ini nga plano nga kun diin, nadakop nira an usa nga local radio blocktimer nga dabi hini nga assassination plot nga yana in naatubang hin mga kaso.
Dugang hini nga ha sakob han pira ka-tuig niya nga pagserbisyo ha bungto dire la ini an siyahan nga nakakarawat hiya hin panhulga, pero ginkokonsidera niya nga “unusual” ini nga assassination plot yana mahitungod nga waray man dako nga accomplishment an iya pagmamangulo nga posible nakasabod ha mga “sindikato.”
Ginkakasubo naman niya an mga sumat-sumat nga dabi an Vice Mayor nga pursoso bugto hini, ha plano. Sumala kan Sabdao may paghisumpay ha pultika an rason han assassinaiton plot, mahitungod nga waray man hira pagkadelito ha personal han iya bugto ngan bangin na-impluwensiyahan ini gihapon han mga oposisyon.
Ginhahangyo naman ni Mayor Sabdao ha mga otoridad an mas halarum nga imbestigasyon agud matudlok dire la an mga direkta nga dabi kundi an mga tinuod nga nagpapaluyo hini nga plano ngan masabtan an motibo han mga ini.
Samtang ha kaluyo naman han panarhog, padayon nga ginbubuhat ni Sabdao an iya responsibilidad kumo mayor han San Miguel, Leyte, samtang naghuhulat ha resulta han imbestigasyon han mga otoridad.
