TACLOBAN CITY – Nakakarawat hin maabot 19 milyon megawatts nga demand ha kuryente hiton mga kunsumedor an buhatan han SAMELCO ini in ha luyo han nakaisa nga Yellow Grid Alert ha bug-os nga Kabisayaan.
Sumala kan Dickson Q. Bernales, Institutional Services Department han Samar Electric Cooperative (SAMELCO II) nga ini nga paghitaas han demand ha kuryente in mahitungod nga hapagkayana damo iton mga kunsumedor hiton ira kooperatiba an nangagamit hin mga appliances nga nakakag-menos hiton kapaso sugad nala hiton electric fan, aircon, ngan refrigerator tungod hiton kapaso han panahon, nga kun diin ini nga mga gamit in primero nga dako iton nakokonsumo nga kuryente.
Labot la hini, dire gihapon malikayan nga pag-abot hiton gab-i in dire magamit an mga molupyo hin suga ngan mga appliances sugad nala hiton telebisyon nga kun diin, nakonsumo gihapon ini hin pira ka watts hiton kuryente.
Ginmalatumat naman han opisyal nga agud nga malikayan iton pag-overload hiton mga substation han SAMELCO in nakatalaan nga magbubuhat hira hin mga scheduled power interruptions kumo preventive measures ngan sugad gihapon mga check-up, maintenance o kun panhingayad, ngan filtering nga kun diin nakatalaan ini nga pagbuhaton yana nga Sabado ngan Dominggo, Abril 20 ngan Abril 21, 2024.
Kun manunumduman nga dida han nakalabay nga mga adlaw in nagpalusad an buhatan hiton National Grid Corporation of the Philippines (NGCP) hin Yellow Grid Alert ha area hiton Bisayas kahuman nga mag forced power outage an maabot 15 nga power stations ha nasabi nga area, mahitungod nga waray na ini kaakos an paghitaas hiton demand han kuryente, rason han pagnipis hiton supply hine nga ginbabatak ha mga electric cooperatives.
