TACLOBAN CITY – Mahugot nga ginkondena ni Samar 1st District Rep. Edgar Mary Sarmiento an magkasunod nga insidente hin panmatay ha pira nga political leaders ngan SK Councilor ha probinsya han Samar.
Sumala kan Cong. Sarmiento, iya iginkakasina nga san-o pa man magtikang an election campaign period in pira nga ambush na an naitala nga gintutuuhan nga politically related.
Una hini, han nakalabay nga Dominggo, tulo an kumpirmado nga patay ngan duha an samaran ha nahitabo nga ambush ha Brgy. Roxas, Sta. Margarita, Samar kun diin an mga biktima in ginkilala nga mga supporters ngan political leaders han provincial opposition head ngan municipality Mayoralty candidate nga hi Col. Emil Zosa.
Sunod nga insidente naman an naitala ha Calbayog City kun diin patay gihapon ha ambush an usa nga SK Kagad ngan samaran an duha nga iba pa nga kaupod.
Nagkaada gihapon hin engkwentro an joint forces han PNP ngan AFP ha pira nga mga miyembro han private armed group ha Calbayog han nakalabay nga adlaw samtang nagdudumara hin operasyon para unta mag isyu hin warrant of arrest ha usa nga pugante ha Samar Sub Provincial Jail.
Ha pagkayana sumala kan Cong. Sarmiento, nagsurat na hiya kan Presidente Rodrigo Duterte, sugadman kan DILG Secretary Eduardo Año, AFP ngan PNP Chief ngan kan Defense Sec. Delfin Lorenzana agud nga matagan hin hustisya an mga namatay nga biktima ngan agud nga malanat ngan mapuypoy an mga private armed groups (PAGs) ha Samar.
