TACLOBAN CITY – Ginpahibaro han pumunan han Sagkahan National High School, nga yana nga petsa 15 hiton Agutso in magkakamayda hira hin Brigada Eskwela para yana nga school year.
Sumala kan Gelma Dagami, School Principal 4 han Sagkahan National High School, nga ira gin aabi-abi an mga kag-anak nga makiusa han ira Brigada Eskwela agud nga magin excited an mga estudyante nga sumulod ha ira mga classrooms sugadman magin malimpyo an bug-os nga campus.
Dugang pa han mao nga opisyal, dire la an mga kag-anak an ira gin aabi-abi, kalakip na gihapon an mga stakeholders han mao nga eskwelahan nga makiusa ha ira pagdudumaraon nga bayanihan agud nga magin mahusay, malimpyo ngan talwas ha mga sakit an Sagkahan National High School ha pag-abre han limited face to face classes.
Naglalaom naman an mao nga opisyal, nga pamamatian an iya hangyo para ha magigin kaupayan han mga estudyante nga namag-enroll han mao nga eskwelahan.
