TACLOBAN CITY – Gin pangunahan ni Presidente Ferdinand Marcos Jr. an rollout han Bagong Pilipinas Rice Program ha ilarom han Local Government Support Fund (LGSF) ngan an paghatag han financial assistance ha mga Presidential Scholars ha ilarom han Socio-Civic Projects Fund (SCPF).
Pag-istorya pa han Presidente, durante han iya pagigin gobernador hin siyam katuig ha Ilocos Norte in waray hira may naipapalusad nga pondo tikang ha LGSF ha barangay level mahitungod nga nagagamit ini ha iba-iba la nga butang, sanglit han magin Presidente hiya in gin sigurado niya mabubutang an pondo han LGSF ha sakto nga butang, kun diin ginsasarahid ini ha mga Governors, City Mayors, ngan barangay level.
Para han Tacloban City, ada ha 500 nga pamilya an nakakarawat hin tag-10 kakilo hin de-kalidad nga bugas para han inisyal nga distribusyon.
Ada naman ha 690 nga Presidential Scholars han syudad an nakakarawat hin tag-P20,000 nga bulig-pinansyal para ha ira pag-iskuyla.
Samtang, makarawat naman hin tag-P100,000 an kada usa han barangay han Tacloban City.
Panuyuan han ginbubuhat nga sistema nga maparig-on an koneksyon han nasyunal nga gobyerno ha mga lokal nga pangobyernuhan mahitungod nga sumala ha Presidente, in may-ada gap o ‘disconnection’ ha butnga han duha nga lebel.
