TACLOBAN CITY – Nagpapadayon an ginbubuhat nga road clearing operations han Tacloban City government ha mga ilegal nga struktura ngan tanan han mga nagpapakaulang ha mga karsada ngan mga barangay ha syudad.
Ini in subay ha kamanduan han national government nga igpadayon an road clearing operations nga una na nga naundang han yana nga tuig tungod han COVID-19 pandemic.
Sumala kan Maridel Burgos, Senior Staff han Tacloban City DILG, han naglabay nga tuig in umabot ha 75% an nahawanan nga mga barangay ha syudad ha ginbuhat nga mga operasyon kun diin an mao nga percentage in pasado ha standard han national government.
Yana nga tuig ha pagpapadayon han clearing operation tikang han Nobyembre 16 tubtob ha Enero in mayda pagbabag-o ha implementasyon hini.
Sumala kan Burgos, tungod nga yana nga bug-os nga bulan han Disyembre in nakapailarom ha General community quarantine an syudad, limitado la an implementasyon han road clearing ha syudad.
Partikular nga gintutukan han syudad an pagtanggal han mga illegal structures, unauthorized parked vehicles ngan tanan nga mga nagpapakaulang ha mga karsada o sidewalk ha syudad.Kaupod gihapon ha pagbubuhaton han syudad ha nagpapadayon nga road clearing operations an pagtudlok hin bicycle lane.
