TACLOBAN CITY – Ginmalatumat ni Leyte Metropolitan Water District General Manager, Ronnie Cornico nga bag-o na an nagmamangulo han suplay han tubig ha syudad, kun diin dida la ini han nakalabay nga semana na pinalisa.
Sumala kan LMWD General Manager, Ronnie Cornico, tikang ha PrimeWater Leyte Metro in magigin Crystal Bridge na an tagmangulo han suplay han tubig ha bug-os nga syudad han Tacloban, sugadman han pito pa nga nasasakupan hini.
Ginmalatumat pa ni Cornico nga ha pagbabag-o han tagmangulo in lauman gihapon an mga pagbabag-o ha serbisyo han patubig ha syudad, kun diin dugang pa hini, yana nga semana in damo na an feedback nga nag-upay an awas han ira gripo nga resulta naman gindudumara nga flushing.
Ginlalauman naman nga ha masunod nga usa ngada ha duha kasemana in magkaka-abot na an ginpalit nga tanker ngan titikangan na an paghingayad han mga nasasalin pa nga araydon ngan babalyuan an mga kinahanglan na bag-uhon.
Nakatalaan na gihapon nga aydon an mga tubo ha may Government Center, sugadman an mga tipakadto ha norte Tacloban agud mas mapaupay na an awas han tubig.
