NATIONAL – Andam na an Philippine Red Cross (PRC) para ha 2025 Midterm Elections tinikangan kakulop nga adlaw, Mayo 9 kutob Mayo 12.
Magde-deploy an PRC hin 2,260 volunteers ngan staff, 28 emergency vehicles, 103 foot patrol units, ngan 51 mobile units ha bug-os nga nasud. Samtang mayda naman 38 nga ambulansya an naka-standby ha mga pangunahon nga lugar samtang naka-alerto an nasasalin nga 178 nga ambulansya ha mga lokal nga chapter han PRC.
Magtutukod gihapon an PRC hin 291 first aid stations ngan 146 welfare desks ha mga lugar sugad han paluparan, terminals, barangay halls, malls, iskuylahan ngan istasyon hin tren. Nakabantay gihapon an Red Cross 143 volunteers ha kada barangay.
Gin aghat ni PRC Chairman ngan CEO Dick Gordon an publiko nga bumutos ngan dayun nga tumawag ha hotline 143 kun mayda mga emergency.
Gintagan-duon naman hine an importansya han talwas nga pagbibiyahe pauli ha mga probinsya.
Sumala naman kan PRC Secretary-General Dr. Gwen Pang, naka-andam na an ngatanan han humanitarian services han PRC, kaupod na an Blood Services, Emergency Response Units, ngan Disaster Management Services, para bumaton ha bisan anu nga insidente.
