Gin dayaw ni Pope Leo XIV an kasaysayan han Estados Unidos ha pagkarawat hin mga imigrante, kun diin gin aghat gihapon niya an Amerika nga magpabilin nga tangkod ha ideals hini mahuman makagawas ha mga mananakop.
Ha usa nga vide message tikang ha Vatican, ginkarawat ni Pope Leo an Liberty Medal tikang ha National Constitution Center ha Philadelphia. Dinhi in ginmalatumat niya nga an pulong nga “America” in nagin simbolo han kagawasan ha bug-os nga kalibutan mahitungod ha pagigin abri hini ha mga imigrante.
Gin aghat gihapon han Santo Papa an Estados Unidos nga igsabuhay an mga prinsipyo nga nakasurat ha Declaration of Independence, labi na ha tikaharani hini nga ika-250 anibersaryo kumo usa nga libre nga nasud.
Subay ha iya, importante nga magpabilin nga giya han Amerika an pagkakaurusa, hustisya, ngan kahimyang nga gintukod han mga founding fathers.
Gintagan-duon gihapon han Santo Papa an importansya han pagproteher ha kinabuhi tikang ha tiyan kutob ha natural nga kamatayon, ngan ginpahayag pa hini nga nakukusol an moral nga karig-on han usa nga nasud ha kun patiunan-o hini atimanan an mga magluya ngan ginmiminos.
Bisan man kun waray hini ngarani hi US President Donald Trump o iba pa nga lider, dati na nga kritiko an Santo Papa ha pira nga patakaran kasumpay ha imigrasyon, nga gintawag niya nga dire makatawo.
Hi Pope Leo, nga tubong Chicago, in waray pa makabalik ha Estados Unidos tikang han mahurar kumo Santo Papa dida han 2025, pero nakikiparte na ha pira nga mga panhitabo pinaagi han video message.
