Naka-heightened alert na an Philippine National Police (PNP) kasumpay han ginlalauman nga gios-protesta samtang gindudumara an pagdungog an International Criminal Court (ICC) kontra kan anay Presidente Rodrigo Duterte.
Sumala kan PNP Chief Jose Melencio Nartatez Jr., ginbutang na ha heigtened readiness an ngatanan han yunit han pulisya ngan presente nga ginbabantayan an dagko nga posible nga katitirok agud masigurado an kahapsay han seguridad han publiko. Dugang pa, anuman an parte o grupo, magbabantay an pulisya agud proteheran an ira mga katungod ngan igpabilin an kahapsay ngan kahimyang.
Kasumpay hini, gin manduhan gihapon han PNP chief an mga regional unit nga magtutudlok han Civil Disturbance Management (CDM) teams ngan siguraduhon nga naka-standby an mga medical emergency responder in kaso magkamay-ada hin dagko nga katitirok.
Bisan man kun iginduon an pagrespeto han katungod han mga residente nga magpahayag han ira opinyon, ginmalatumat ni Nartatez nga prayoridad la gihapon han PNP an katalwasan han publiko.
Dugang pa hini, maximum tolerance an igpapatuman pero ginmanduhan gihapon an kapulisan nga magpabilin nga propesyunal ngan maglikay ha anuman nga komprontasyon ngan sundon an balaod.
Samtang, nanawagan naman an PNP Chief ha mga kritiko ngan tagasuporta ni Duterte nga magpabilin nga kalmante ngan dire pabay-an nga magdaog an emosyon nga pwede magresulta hin kasamok o pagtalapas ha balaod.
