Igin suhestyon han Bangko Sentral ng Pilipinas (BSP) an bag-o nga patakaran agud agdahon an mga bangko nga magpautang para ha eco-friendly o climate-resilient nga pabahay.
Ha ilarom han draft circular, hihibub-an an “credit risk weight” han sustainable housing loans tikang 50% ngada ha 20%.
Karuyag signgon hini, mas gutiay an pondo nga kinahanglan ig tago han mga bangko kaun nagpapautang para ha mga sugad nga balay — rason nga mas maeengganyo an mga ini nga pondohan.
Panuyuan han BSP nga mas pakusgon an kakayanan han nasud nga makadungan ha epekto han climate change, labi na nga kasagaran maigo an Pilipinas hin baha, bagyo, ngan subra nga kapaso.
Sumala ha BSP, gutiay pala an sustainable housing projects ha nasud, rason kun kay ano kinahanglan hin sugad nga pitad agud mas maparibhong an lokal nga merkado. Kaparte an mao nga pitad ha pagpapatuman han Pilipinas ha mga saad hini ha ilarom han Paris Agreement.
Agud makuha an benepisyo, angay la nga an balay in may-ada mga “green” features sugad han:
Energy-efficient design
Water conservation systems
Proteksyon kontra baha (hal. elevated floors, maayos nga drainage)
Paggamit hin renewable energy sugad han solar panels
Ha kabug-osan, gin-lalauman nga makakabulig an mao nga balaodnon agud dumamo an mga climate-resilient homes ha nasud.
