NATIONAL – Gin klaro han Philipine National Police (PNP) nga waray tuguti ni PNP Chief PGen. Nicolas Torre III an bisan hin-o man nga fitness instructor nga manguna ha bisan anuman nga fitness program para ha bug-os nga organisasyon.
Ine in mahuman nga maimbitahan han Public Community Affairs and Development Group (PCADG) an fitness vlogger nga hi Rendon Labrador para ha 93weight loss challenge ha nasabi nga yunit.
Ha nagin memo nga ginpagawas ni PNP Directorate for Police Community Relations Director PMGen. Roderick Augustus Alba, an nasabi nga physical activity dida han nakalabay nga Hulyo 19 in inisyatibo han PCADG ngan mismo mga membro la han yunit an kaupod hine.
Subay pa ha memorandum, ginmanduhan an mga kapulisan nga undangan an pagpapa-angbit hin mga misleading contents mahitungod nga waray naman nagin mando an hepe nga kumuha hin fitness instructor para pangunahan an bisan anu nga physical activities o trainings.
Ine in agud malikayan an pagsarang han mga sayop nga impormasyon nga posible magin rason ha pagka-lipong han publiko.
Samtang, waray gihapon nagin personal nga hibaro hi PNP Spokesperson PBGen. Jean Fajardo kabahin ha pagigin fitness coach ni Labrador ha PNP.
