TACLOBAN CITY – Pira nga mga taga rehiyon otso an nakiusa han yinukot-yukot nga mga indibidwal nga nagdumara hin gios protesta bahin han pag implementar han Land Transportation Office-(LTO) han Private Motor Vehicle Inspection Centers (PMVIC).
Sumala kan Atty. Neil Sia, President Sirak Waraynon Eagles Club, ginklaro hini nga diri hira natarihas han modernization program pero an ira panguna nga concern in amo an kadako han posible nga magiging problema ha mga motorista hilabi na ha dalagan han trapiko ha rehiyon kun igkaso nga maipatuman an operasyon han PMVIC.
Asya nga nagkaurusa hira nga igpanawagan ha LTO an pagkansela la han operasyon han PMVIC hilabi pa ha panahon pandemya.
Sumala pa kan Sia nga kun susumahun in kaurugan ha mga nagiging problema ha kadalanan in an nawarayan hin preno ngan danay la an kaso nga vehicle unworthiness.Magiging pakuri liwat ini para ha mga motorista mahitungod mabiyahe pa hira ha kahirayo nga lugar agud la nga mapa-check an ira mga sarakyan labi pa nga upat la an PMVIC center ha rehiyon.
Mababaruan nga una na ginyakan ni Rodelio Poliquit, Regional Director, Land Transportation Office (LTO), nga full operational na an PMVIC ha siyudad han Ormoc samtang nakatalaan liwat na abrehan an branch hini ha siyudad han Tacloban sunod nga semana.
Utro nga ginduon han mao nga opisyal nga an ira ginbubuhat nga pitad in para la han katalwasan han mga katawhan.
Mababaruan nga dida han Oktubre han 2020 han patikangan han LTO an operasyon han PMVICs ha bug-os nga pilipinas mahuman an ginpalusad nga Memorandum Circular 2020-2217 ha luyo han gin aabat nga pandemya.
