TACLOBAN CITY – Nakatalaan na mag abre an pira nga mga tourist destination ha siyudad han Borongan, Eastern Samar.
Sumala kan Marissa Acorin, tourism officer han Borongan City, ginpapamulat nala nira an executive order (EO) agud nga matikangan na an pagbalik operasyon han mga tourist destination ha ira lugar.
Ha pagkayana in hinay-hinay na an ginbubuhat nga preparasyon han tourism office sugad han paglatag han guidelines para ha mga mabisita.
Dugang pa hini nga strikto nira nga igpapatuman an pagsusul-ot hin facemask, paggamit hin alcohol o sanitizers, pagbutang hin handwashing area, physical distancing ngan iba pa nga mga health protocols.
Sugad han kamanduhan han IATF 50% la han total capacity han usa nga tourist destination an pupuydi nga makasakob ngan tanan in ig-aagi anay ha pre-booking.
Ginpapaghingadayan pa naman nira kun tutugutan na gihapon an mga taga katharani nga bungto nga makabisita ha ira mga tourist spots o inin in magigin exclusive la anay para ha mga residente han Borongan.
